अशी झाली 'उलीशी' श्रीरामनवमी सुरू..

श्री समर्थ लहानुजी महाराजांचे शिष्य श्री नामदेव महाराज हे गव्हानिपाणी या गावात राहतात. तिथे श्री सत्यदेव बाबा रामनवमीसाठी जात असत. दरवर्षीप्रमाणे १९७१ ची श्रीरामनवमी करण्यासाठीसुद्धा श्री समर्थ सत्यदेव बाबा, श्री सत्य नामदेव महाराजांकडे गव्हानिपाणी येथे गेले. याप्रसंगी कावलीचे श्री. बाबासाहेब इंगळे, आसऱ्याचे श्री. उद्धवराव देशमुख, पिंपळखुटा येथील पुंडलिकराव रुद्रकार, श्री. नामदेवराव धामंदे, श्री. मारोतराव वानखडे हे सोबत होते.

परंतु या वेळी श्री समर्थ सत्यदेव बाबांना काय वाटले कुणास ठाऊक, ते श्री नामदेव महाराजांकडे गेले, थोडा वेळ थांबले व सोबतच्या सर्वांना घेऊन कावली येथे गेले. तेथून तडक पिंपळखुट्याला आश्रमात परत आले. आपल्याबरोबर श्री संत शंकर महाराजांना उद्देशून म्हणाले, "आता याच्यापुढे आपली रामनवमी इथे करत जाऊ, पतली पतली दाळभाजी अन् कण्या कराव! व उलीशी रामनवमी कराव!" असा आदेश श्री समर्थ सत्यदेव बाबांनी दिला व तो श्री समर्थ शंकर बाबांनी शिरोधार्य मानला. आज या उलीशी 'रामनवमीचे स्वरूप अवर्णनीय असे झालेले आहे. अजूनही रामजन्म सोहळ्याच्या दिवशी महाप्रसादासोबत कण्यासुद्धा असतातच. रामजन्म सोहळा हृदयी साठवत, बाबांच्या अमृतवाणीचे रसपान करून भक्त धन्य होतात. अशाप्रकारे श्री समर्थ सत्यदेव बाबांनी सुरू केलेल्या आश्रमावरील या 'उलीशा' रामनवमीच्या लीलेचे रहस्य गुरु-शिष्य दोघेच जाणोत. या उत्सवात सामूहिक विवाह देखील पार पडतात.

असा झाला समर्थांचा प्रकटदिन सुरू..

श्री समर्थ सत्यदेव बाबांच्या वाढदिवसाचा कार्यक्रम नागपूर येथे आयोजित केला होता. त्याच वेळी समर्थ सत्यदेव बाबांनी उपस्थितांना आदेश दिला, “आमच्या वाल्याचा असाच करत जा!" तेव्हापासून श्री समर्थ सत्यदेव बाबांच्या आदेशाचे पालन म्हणून केवळ श्री समर्थ शंकर बाबांनी प्रकट दिन साजरा करण्याला परवानगी दिली आणि हरतालिकेच्या दिवशी म्हणजे शु. ३ भाद्रपद या तिथीवर त्यांचा वाढदिवस साजरा होत आहे.